Ua tolopo le faaiuga a le Faamainoga Faitumalo mo le alii Saina o Qingping Yan i le Aso Faraile na mavae nei, seia tagai lana loia i le fua faatatau ua faatulai e leoleo o le tau o fugafuga ma isi figota o le sami pe a faatau atu i maketi i fafo, e avatu ai sa latou finauga i le Faamasinoga mo sana faaiuga i le solitulafono a lea alii.
O loo molia lea alii i le moliaga e tasi o le auina atu faasolitulafono o taga e silia i le 200 o fuafuga, maisu ma isi figota o le sami mai Samoa nei i atunuu i fafo.
E lata i le lua miliona tala le tau o ia taga, ma ua mae’a ioe lea alii i lona moliaga.
O le valaauga talu ai o lea mataupu na poloaiina ai e le Faamasinoga le itu a leoleo ina ia agai atu i le valaauga lenei ma se fua poo se formula e galueaina ai pe calculate ai se tau o figota o le sami e fua iai se sala tupe e tuuina atu i lē ua molia.
I le manatu o le faamasinoga o loo i le tulafono le tusa ma le $300,000 le sala tupe, pe a maua se isi o soli le tulafono lea, peitai o le tupe ua faamaonia e maua e lea alii Saina i figota ua fuafua e auina atu e lata i le lua miliona tala, ma e lē talafeagai lea tulaga.
O le sala tupe e lua sa faatulai atu e leoleo i le tausaga ua mavae e silia laitiiti i le $100,000 tala.
O le Aso Faraile i le finauga faaiu a leoleo na faailoa ai e le tamaitai loia o loo tulai mo leoleo i lea mataupu i le faamasinoga le Afioga Lupematasila Iliganoa Atoa e faapea, o lē sa avea ma Ofisa Sili o Pulega mo le Matagaluega o Faatoaga ma Faigafaiva ia Tilafono Hunter, o ia lea e iai lona tomai faapitoa i le faatusatusaga o tau o ituaiga oloa faapea i maketi i fafo, sa iai lona sao i le galueaina (calculation) o le fua poo le formula na oo atu ma leoleo.
Na faatoa maua le finauga faaiu lea a leoleo e le tamaitai loia ia Muriel Lui o loo tulai mo Yan i le taeao lea o le Aso Faraile.
O le faaiuga la ua tuuina mai e le alii Faamasino ia Leota Raymond Schuster e toe tolopo i le vaiaso nei lea mataupu seia agai le tamaitai loia a Yan e faitau i le finauga a leoleo ma tuuina mai se tali iai.
Ae ua poloaiina foi e le Faamasinoga le itu a leoleo e tāua pe a maua ma se avanoa o lē sa ia galueaina le formula se’i faafofoga iai le faamasinoga i lana faamalamalamaga, pe na faafefea ona maua le tau ua faatulai atu.
O Yan na taumafai e auina atu le pusa oloa lenei ma taofia ai loa e le ofisa o Tiute ina ua masalomia o fugafuga o loo iai.
Sa tatala le pusa ma maua ai e le ofisa o le tiute ma le Matagaluega o Faatoaga ma Faigafaiva taga o fugafuga ma isi figota o le sami.
Ua faailoa e leoleo ia latou faamatalaga na taumafai foi lea alii e totogi atu ni tupe i lē sa avea ma Ofisa Sili o Pulega o le Ofisa o le Tiute i le 2020 ma faatalanoa le tulaga o lana pusa oloa.
O loo taofia lava e oo mai le taimi nei e le Ofisa o le Tiute le pusa oloa o loo iai taga e silia ma le 200 o fugafuga ma isi figota o le sami seia mae’a lenei mataupu i le faamasinoga ma sona faaiuga.
