O le valaauga muamua o le talosaga a le Fofoga Fetalai o le Palemene ua faaulu i le faamasinoga sili, ua talosaga ai mo se iloiloga i le mataupu o le faamavae o sui faipule e toatolu mai le vaega faaupufai e puipuia aiātatau a tagata, ua toe tolopo atu i le aso 27 o le masina nei o Fepuari e maua ai le avanoa e feiloai ai i le latou loia mo nisi tapenaga e tuuina atu i le faamasinoga.
O le tamaitai loia o Miruel Lui ua tulai e finauina le tetee a le tofa Ale Vena Ale, o Tuu’u Anasii Leota, ma le tofa Mau’u Siaosi Pu’epu’emai i le moliaga a le Fofoga Fetalai e faavae i le aiaiga o le faavae ma le Tulafono o faigapalota i le tatau i sui usufono ua molia ona faamavae mai o latou tofi faipule ae toe foi e faatino a latou palota laiti.
O le tetee a ia sui faipule ua faaauau ai pea ona latou tauave tofi faipule o itumalo na filifilia i latou, ae talia se faaiuga a le faamasinoga sili.
