Ua molimauina e le faamasinoga i ana suesuega ma faaiuga ua mae’a faia i solitulafono o le talepefale ma le gaoi e lē o faaitiitia ae faatupulaia tagata e molia atu i le faia o lea solitulafono.
O se alii 23 tausaga o le nuu o Letogo o ia lea o Ioane Filemu ua atoa nei le vaiaso talu ona tuli lona faasalaga faafalepuipui e tausaga ma le 10 masina ina ua faamaonia lona ioeina o moliaga o le talepefale ma le lima tagoese, ina ua ia osofai ni fale o ni aiga se tolu e lua i Letogo ae tasi i Vailele.
O lana gaioiga muamua na ia ulufale faamalosi ai i le fale o se tina e faapea mai leoleo sa faasuāavā ma talanoa i lana telefoni, ae ina ua moe pe tofa na maua ai le avanoa o Ioane e agai i le fale ma ia aveese mai le telefoni samsung taugata a le tina e $1,256 tala le tau.
Na ia toe osofai le fale o se isi aiga o lea lava nuu ae na sese le fale na taumafai e faatino ai se solitulafono ona o le fale o le faiaoga o le aulakapi taitoafitu a le Manu Samoa, lea na ta’ua e leoleo na ala lē e ona le fale ma ia vaaia ai lē ua molia ma ia tuliesea ai.
O le aiga i Vailele na sao ai lana gaioiga lona tolu ma ia aveesea ai se pusa pisupo 3 pauna, ae na saili atu i le faleoloa o le nuu lea ae maua ai sa faatau iai e Ioane le pusa pisupo.
O masina o Oketopa, Novema ma Tesema o le tausaga na tea nei na faatino ai osofaiga tau talepefale e lē ua nofosala nei i le falepuipui.
