E toafā tamaitai ua tofia e le Iunivesite Aoao o Samoa i le tulaga maualuga o faailoga ma la latou auaunaga i le atina’eina o fanau oloo aotauina ile Iunivesite.
I se pepa o faamatalaga faalauaitele mai le Iunivesite o i latou nei ua filifilia Tuifuisaa Patila Amosa, o le Sui Ao o le Iunivesite ua umia lenei tofiga i le vaega o Fasaienisi ma le Siosiomaga, Funemalafai Taema Imo-Seuoti, o le Faauluuluga o mataupu Faasaienisi, Tuiloma Susana Tauaa ma Dr. Anita Latai-Niusulu i mataupu o le Geography.
O le tofia ai o tofi maualuluga nei o le masani lea a soo se Iunivesite i le atina’eina o aoaoga ma o loo faatino foi e le Iunivesite a le atunuu a o loma ai le atoaga o le 40 tausaga talu ona faavaeina.
O vaega e ao ona ausia i nei tofiga maualuluga e ao ona mataina le tulaga o tusipasi ma faailoga i sikolasipi suesue, o le itu o le aoaoina o alo ma fanau aemaise o le auaunaga lautele i le atunuu.
O faamaumauga e faamaonia ai nei vaega sa iloiloina e nisi o sui mai le atunuu o loo iai faailoga maualuluga aemaise o polofesa mai Iunivesite i fafo.
Ua 11 ai i latou o loo umia nei tofiga maualuluga i le Iunivesite.
