Sa vaaia i le vaiaso na te’a nei i le taulaga i Apia le toe tula’i mai o vesiga i le va o nisi o fanau a’oga a kolisi e lua o Maluafou ma Sagato Iosefo.
Peitai sa toe vaaia le faifai tetele o ia vevesi i le aoauli ua tuua a’oga i le Aso Gafua o lenei vaiaso.
O le nofoaga faatali pasi i Savalalo na molimauina le toe aliali mai ai o ia vaaiga lē lelei, a o pisi taavale ma tagata feoa’i i feau masani, aemaise o nai fanau o loo faatau savali a latou oloa e saili ai ni tupe mo fuafuaga a o latou aiga.
E lei manuia taumafaiga i se faamatalaga mai leoleo poo iai ni fanau ua molia, peitai sa vaaia i ata video o telefoni feavea’i sa salalau i luga o le api o foliga, le faamanu’alia ose tasi o fanau a’oga mai le kolisi o Maluafou.
E taunuu le to’atele o alii ma tamaitai leoleo i le nofoaga ua mae’a le vevela o ia vesiga, lea e lē o iloa le mafuaaga.
E iai le talitonuga o le mae’a faapipii ai o mea pu’eata CCTV i nofoaga e tumutumu iai le atunuu i le taulaga, e pei o le nofoaga faatali pasi i Savalalo, o le a fesoasoani lea i malu o le malo ia latou su’esu’ega.
O le itu mautinoa e lē mafai ona ela le pupula malosi o ia mea pu’eata i foliga o tagata sa tumutumu ai i le taimi o ia vevesi, ma e maua lelei ai foi foliga o fanau sa faatupuina lea vaaiga matagā.
