O loo feutagai nei leoleo ma sui o le faalapotopotoga ua ta’ua o le Blockade Australia ina ua poloka foi faigamalaga a loli ma trains la’uoloa i nisi o uafu tetele i le setete o Niu Sa Uelese, Vitoria ma Kuiniselani ona o faiga a sui o le faalapotoptoga lea ua o latou uia ai nofoaga ia ma faailoa lo latou tetee ona o suiga o le tau.
O se tasi tamaitai mai le Blockade Australia na ia aea se tasi o alalaupapa e lata i le Port of Newcastle ma faailoa ai lona tetee.
E le fou le vaega lea i le matafaioi lea o le faailo o a latou finauga e ala i le faalavelavea poo le polokalaina o auala ma vaega e agai atu ai femalagaa’iga lautele a tagata.
O loo i luga o le alalaupapa lea tamaitai ma le faamatalaga e le sau filemu i lalo.
Ua lipotia mai foi i le uafu i Brisbane o loo aea ai foi e se tasi tamaitai o sui lava o le kulupu lea se pou e fesootai agai iai nisi o auala tetele, highway e agai atu i le uafu.
A o lei tāina le 9 i le taeao analeila ae faailoa mai ua iai foi se tasi alii ua a’e foi i se tasi o pou tele i le faaitu lea e lata i le uafu tele i Melepone e faailoa ai foi lona ia tetee.
I sa latou pepa o faamatalaga ua o latou faailoa ai o ia gaioiga uma fai faatasi o se tali atu i le tali a Ausetalia o loo faailoa ane i le mataupu lea i fesuiaiga o le tau.
E iai isi tetee na faia muamua e le kulupu lava lea na tapunia ai ma galuega fai i uafu ma le aveina atu o le koale i atunuu i fafo mai uafu o Ausetalia.
