O le Aso Lua o lenei vaiaso na toe maua ai feiloa’iga masani a tusitala ma le aufaasalalau ma le faauluuluga o le matāgaluega o leoleo, falepuipui ma le toe fuata’ina i le tuana’i o ni tausaga e le’i toe faia lea feiloa’iga masani ta’i vaiaso.
O le tāua o lea feiloa’iga e tāpā ai se finagalo o le Komesina poo ofisa sinia o le matāgaluega i matāupu e fesiligia ai e le vasega o tusitala.
O se tasi lea o avanoa ua faafetaia e alii ma tama’ita’i o loo galulue i le logologo puialiiina o le atunuu ma fausia ai se sootaga māfanafana ma vavalalata ma lea auaunaga tāua a le malo o loo faamalosia le tulafono.
O loo talosia ia aveave ai pea lea suiga lelei ua toe finagalo iai lē ua tauaveina le vaaia o le matāgaluega a o tālia ai se filifiliga o se tasi e avea ma Komesina lea ua faamaonia mai e le susuga Leiataua Samuelu Afamasaga o loo avea ma Sui Komesina, o loo talosaga i le avanoa lea e tapunia tusi talosaga i le aso 10 o le masina nei o Novema.
