Ua toe tatala nei le faaulufale i Samoa o ‘ula ma teu fugalaau mai le teritori o Amerika Samoa ae o loo tapu pe faasā pea mo se taimi lē tumau ona faaulufale mai i le atunuu laau totō mai Tutuila ma Manu’a.
Ua faailoa e le vaega o suesuega ma faamaumauga faasaienisi a le malo o Amerika Samoa le faagasolo o a latou taumafaiga mo auala o puipuiga e faaitiitia ai aafiaga o le oo atu i le teritori o le loi mūmū laititi o se manu faalafua, o le mafuaaga lea o le faia o le faaiuga a le matagaluega o faatoaga ma faigafaiva a Samoa Tutoatasi, e toe faaulufale na o ‘ula ma teu fugalaau mai lea vaega o Samoa na lua ae e aumai i aiaiga e pei o le tatau ona iai se pemita faataga, ma ia fana pe spray lelei i se vailaau e mautinoa ai ua saogalemu mo le faaulufale mai i Samoa.
E ao foi ona teu malu lelei i ni pusa ma ia lelei ona faia ia tapenaga, ina ia mautinoa ua saogalemu.
Mo le Setete o Hawaii ma isi atunuu e lē o mafai lava ona faaulufale mai i lo tatou atunuu ia vaega ona o puipuiga o le loi mūmū laititi.
Ua faailoa e le matagaluega o faatoaga ma faigafaiva i se pepa o faamatalaga faalauaitele, o ‘ula ma teu fugalaau uma e aumai i le atunuu mai Amerika Samoa, o le a toe siakiina uma e alii ma tamaitai o le ofisa fā’asu poo le quarantine.
