O se tala fiafia i tagata Aukilani le faasalalauga ua sau, o lea ua saogalemu le agai i matafaga mo taelega faapea ai fagotaga.
O le taeao nei e faia ai le sauniga e faapaia ai le toe faaleaogaina aloaia o le sa i Waitemata Harbour, lea na lē mafai ai ona agai le toatele i le sami ona ua alu vai o otaota lafoai agai i le sami.
Ua uma talanoaga a le Ngati Whatua Orakei ma le pulega o le suavai a Aukilani le Watercare ma ua faamautinoa mai ai o lea ua mae’a suesuega na faia ma ua mautinoa ua toe saogalemu le suasami mo taelega ma fagotaga.
Ua faafetaia ai foi e le pulega tagata Aukilani i le lava onosai i taimi na tapunia ai matafaga.
Ae mo le agai i luma ia mautinoa e lē toe alu ni vai o otaota lafoai agai i le sami, o lea ua faatulaga fonotaga e faia i vaiaso o i luma.
