Ua ave le talosaga a le World Health Organisation (WHO) ia Saina, e faailoa mai lipoti o le Koviti o loo aafia ai nei.
O le faaiuga o le vaiaso faatoa sau ai le tala mai Saina e ta’u mai ai le latalata i le 60,000 o tagata maliliu talu mai le amataga o Tesema lea na faaleaogaina uma ai ana sā o le Koviti e ui i le tumutumu o falemai.
O le tala foi na sau mai le malo o Saina e faapea o le 5,503 o tagata ia na maliliu ona ua aafia mānava ma māmā ona o le Koviti; o le 54,435 o tagata maliliu ona o le kanesa, fatu ma isi faamai ma na fesoasoani iai ma le Koviti ma o faamaumauga nei i le va o le aso 8 o Tesema ma le 12 o Tesema lava.
O le mae’a ai ona sau o le lipoti a Saina, na valaau ai loa le faatonu sili o le WHO i le telefoni ma talanoa i le minisita o le soifua maloloina a Saina ma o le talosaga ua ave nei iai ia faaauau pea ona tuuina mai lipoti mo le silafia e tagata lautele.
E ui la ua tuuina mai le lipoti mai Saina, ae i nisi o lipoti e le o faigofie ona talia ona e na o tagata maliliu i falemai o loo faitau ai ae e le o faitaulia ai tagata maliliu i tua, atoa ai ma le faamatalaga e le o toe talitonuina lava ni lipoti a Saina.
