Ua toe tali ane le taitai o le Itu agai a Niu Sila i le alii palemia ma le vaega faaupufai a le Leipa e tusa ai ma le iuga o se palota faataitai sa faia e le 1News public poll, fai mai a latou e leai lava se mea o suia.
O le faamatalaga a Christopher Luxon sa faia i luga o le NewstalkZB ua ia ta’ua ai o le tulaga o Hipkins ua lagolagoina e lona ofisa, le ofisa o le Palemia ma o le a toe foi lava i le tulaga na iai e leai se suiga, o le malo lava e tasi ma se taitai e le mafai ona ia kilivaina mea o loo faatalitalia e tagata.
Fai mai Luxon e ao ona tuu le avanoa i tagata e fai ai a latou faaiuga ma o loo iai lava le avanoa lea e 9 masina e faalauiloa ai le latou foi finau i tagata o le atunuu.
Saunoa Luxon o le mea o loo manaomia e le atunuu o le faaaitiitia o le tau o le soifuaga, toe faatumau tulafono ma le nofo filemu ma ia taulai i tulaga tau aoaoga.
O le iuga o le palota faataitai ua faailoa ai e lima togi o loo sili ai le Palemia fou Chris Hipkins nai lo le taitai o le Itu agai.
E 23 pasene o loo faamauina ai le aofai o tagata na palota e filifili e faatumau pea Hipkins o le Palemia filifilia o Niu Sila ae o le taitai o le National e 22 pasene.
