O le aso 30 o le masina lenei o Ianuari e toe amatalia ai galuega a le Faamasinoga lea o le a toe faaauau ai ma galuega a le Faamasinoga o Fanua ma Suafa i le tagofia o mataupu e silia i le 200 sa le mafai ona suesueina, ona sa iai le to’a i nisi o aiaiga o le Tulafono o Faamasinoga o Fanua ma Suafa o le tausaga 2020, e faasino i le filifilia ma tofia o faamasino o lea faamasinoga tāua a le atunuu.
Na pasia ni teuteuga i le Palemene i le masina o Tesema o le tausaga na tea nei, lea ua avanoa ai ona tofia faaletulafono faamasino latou te tagofia mataupu a nuu ma aiga i suafa matai ma eleele faaleaganuu.
O le pasia foi o ia teuteuga i le tulafono autu na pasia ia Tesema o le tausaga e 2020, ua mafai ai foi ona tofia le sui Peresetene o lea faamasinoga e pei ona sa faia lea tofiga i le faaiuga o le tausaga e 2021 ae na toe faasolomuli ma lē faaauauina, ina ua alia’e faaletonu i aiaiga o le tulafono fou ua toe teuteu nei ina ia mafai ai ona faia lea tofiga e tusa o ala o le tulafono.
Ua manino mai ai foi o le auala lea o le a faatino e aunoa ma le soloia o le tulafono fou o faamasinoga o fanua ma suafa, o le teuteu o nisi o aiaiga.
O le aveesea atoa o le tulafono e pei ona finau ai le vaega faaupufai o le faatuatua i le Atua Samoa ua tasi o le a latou faatino pe a tulai e avea ma faigamalo, e manaomia le lua vaetolu o nofoa o le Palemene ina ia teuteu ai le tulafono faavae e avanoa ai ona faataunuu lea tulaga.
O le aso 30 o Ianuari e toe amatalia ai galuega a le faamasinoga i le suesueina o mataupu, ae o le matagaluega e toe a’e uma i le aso 9 o le masina nei e pei o isi matagaluega ma faalapotopotoga a le Malo.
