O le a toe alu le isi solo tetee a faiaoga o kolisi maualuluga e finauina ai pea totogi ma taiala o auaunaga faafaiaoga.
O le iuga lea ua toe palota iai faiaoga uma o kolisi maualuluga ma o le Aso Lulu o le vaiaso nei o loo faamoemoe e faia ai.
O le palota na faia online i le vaiaso talu ai e le gata o le solo tetee i le vaiaso nei, ae ua sau ai foi ma suiga faaopoopo e amata aloaia pe a foi mai le tuuaga muamua o lenei tausaga faaleaoaoga lea e amata malolo mai le vaiaso fou.
O suiga nei e aofia ai le lē toe nonofo o faiaoga i fonotaga e faia i tua atu o itula masani o aoga, ma e amata aloaia mai le Aso Gafua 24 o Aperila lea e toe a’e ai mo le kuata lona lua.
O le vaiaso lona lua o le kuata lua o le a faatulaga ai vasega taitasi e aooga mai i le fale mo le fā vaiaso, ma le vaiaso lona tolu lea e amata i le aso 8 o Me o le a tofu ai lava faiaoga o aai taitasi ma le aso e solo tetee ai.
Ae i nei fuafuaga uma, ua fai mai le iuni e mafai ona le taunuu le solo tetee i le Aso Lulu ma faaleaoga tapenaga ua iai mo le kuata lua pe a vave ona maua se maliega e malilie uma iai itu e lua, ma o loo faamoemoe uma i le tali a le malo.
