Ua toe sainia nei se isi konekarate a le alii o Beauden Barrett i le NZ Rugby faapea foi ma le Auckland Blues seia aulia le faaiuga o le 2027.
Ua faamaonia lea tulaga i lipoti i le aso ananafi ma ua fiafia ai foi le toatele o i latou e taumulimuli i taaloga a le All Blacks faapea foi le taaloga lakapi lava ia.
E 32 tausaga o Barrett ma ua faailoa o loo tapena i le taimi nei e taalo i le taamilosaga i Iapani le Rugby League One mo le Toyota Verblitz a o lei toe foi mai i le All Blacks i le ogatotonu o le tausaga fou.
Saunoa ai le faiaoga fou o le All Blacks, Scott Robertson o le toe saini o Beauden i le ‘au a le atunuu o se tulaga lelei tele lea ma tāua le faasoa o lona silafia i le taaloga.
O le a tumau pea foi Beauden i le kalapu a le Blues mo le Super Rugby o le 2025 ae o le tausaga fou o le a agai ai i lana kalapu lea i Iapani lona uiga o le a malolo ai mai le taamilosaga i le tausaga fou.
Ua 150 taaloga a Barrett i le Super Rugby e le gata mo le Hurricanes ae faapea foi mo le Blues talu mai le 2020.
