I le māta’ituina pea o tulaga o le pepesi ai o le faama’i o le misela i nisi o itu o Niu Sila, ma aafia ai nisi o a’oga maualuluga ma kolisi, o lea ua faamaonia mai le toe foi ai i le a’oga ma potu a’oga o le to’atele o fanau a’oga o le Wellington Girls’ College, e ui o lea a’oga na maua ai le to’atolu o ē ua aafia i le faama’i.
I faamatalaga mai le RNZ, e 900 tagata o ē e faapea na lalata ma fesoota’i atu i le tagata ua aafia i le misela a o iai i le laugatogi a le kolisi, ae peita’i i se tala lata mai, mai le auaunaga o le soifua mālōlōina na māua ai ia latou iloiloga, e la’iti’iti lava le li’o o tagata na fesoota’i atu ai i lea tama’ita’i a’oga.
E na o i latou na maua faailoga i le laugatogi, o le aufaafiafia ma faia’oga.
Faamauina e 23 fanau a’oga ma le to’alima o faia’oga o loo faanofoesea i le taimi nei.
Ma e faaalia o fanau e le’i faia tuipuipui e tatau ona faamalosia le nonofo i le fale.
Na faamanino e le pulega, o le tapunia ai o le a’oga, o se gaioiga na faatino ina ia maua le avanoa e sa’ili ai ē na fesoota’i atu i lē ua aafia (contact tracing) ma sa’ili ai tulaga o iai tuipuipui o fanau.
O loo faasolo su’ega o le NCEA mo le to’atele o vasega matutua o kolisi ma a’oga maualuluga i le atunuu.
Puna o Faamatalaga: https://www.nzherald.co.nz/nz/wellington-girls-college-allows-most-students-to-return-to-school-after-measles-cases/QNAW334GNJHYFJYIAVOKV65RCU/
