O le fonotaga a le Kapeneta i le vaiaso nei o lea ua faia ai le faaiuga ina ia toe tofia le Afioga Tanuvasa Oloapu Petone Mauga, e toe tauaveina mo le isi 3 tausaga, le tofi o le Pule Sili o le Pulega o Tineimu ma Faalavelave Faafuasei (S.F.E.S.A.).
Ua 25 tausaga o tautua lenei tamalii i le Malo o Samoa, ma o le 16 o na tausaga sa tautua ai i le Matagaluega o Leoleo, a o lei tofia e avea ma Sui Komesina i le vaega o Auaunaga Faapitoa ma le tali atu ai i Faalavelave Faafuasei.
O le Afioga Tanuvasa o se tasi e tele lona silafia ma tomai faapitoa i le auaunaga tau leoleo e patino i luga o vaa a leoleo sa galue ai i luga o le Nafanua mo le puipuiga o le gataifale, ma sa avea ai o ia ma Taitai Leoleo ma sa galue ai i luga o le vaa a leoleo.
O le Afioga Tanuvasa na amata mai ana aoaoga i le Aoga Tulagalua a Apia Infants, faasolo i le Apia Primary ma sosoo ai ma Leifiifi Intermediate, ona au lea i le Kolisi o Avele, ma faaiu ai i le Iunivesite Aoao o Samoa le N.U.S.
Sa faaauauina ana aoaoga i atunuu mamao i le Kolisi a le Australia’s Maritime ma le Kolisi a le U.S. Naval i Rhode Island.
O le lona lua lenei o nofoaiga a le Afioga Tanuvasa i le tofiga o le Pule Sili o le Pulega o Tineimua ma Faalavelave Faafuasei.
