O le tamaitai laufali a Samoa i le taaloga o le soka o Maria Salamasina o le a toe auai foi i le Ipu o le lalolagi a le FIFA i le tausaga nei o se laufali lagolago ma o le faalua ai lea ona auai i lea tulaga.
O le taamilosaga e talimalo ai Niu Sila ma Ausetalia ma o Salamasina sa avea foi ma laufali lagolago i le Ipu o le lalolagi i le soka lava i le 2019 i Farani.
Na ia ta’ua i se faatalanoaga i le RNZ e faapea, e na te lei mafaufauina le toe valaauina o ia e avea ma laufali lagolago i le tausaga nei ona sa tapunia uma taamilosaga soka i Samoa ona o le koviti.
O le a aofia ai Salamasina faatasi ma isi laufali e 33, laufali lagolago e toa 55 ma le 19 o video match officials o le a faafoeina le taamilosaga i le tausaga nei.
O se tulaga lelei foi ua ausia e sea alo o Samoa i lea taaloga ma ua ia faailoa o le taimi nei o loo toleni lava ina ia faamautuina lona malosi fitness auā lenei faamoemoe.
