Ua toe ave le faatuatuaga o le Kapeneta i le Afioga Lematua Gisa Fuata’i-Purcell na te ta’ita’ia le Ofisa o le Pulega Faatonu mo le isi tolu tausaga.

I le mae’a o iloiloga a le Komiti Faapitoa na feagai ma faatalanoaga ma le iloiloina o lea avanoa, ma tuuina atu ai le fautuaga i le laulauāfono a le Kapeneta, ma faamaonia ai i lana Fonotaga i lenei vaiaso, le toe faaauau o lea tamalii o le atunuu i le tofiga o le Pule Faatonu mo le Ofisa o le Pulega Faatonu a Samoa. 

O Lematua, ua lava lona silafia, ma ua loa foi lona malamalama i le faatinoga o lea auaunaga, ma o loo ia umia faailoga taualoa o le Masters in Commerce and Administration mai le Iunivesite a Vitoria i Ueligitone, Niu Sila i le 2003, e aofia ai ma le Post Graduate Diploma in Information Systems Management.

O le 1973 na i’u mai ai ana a’oa’oga mai le Kolisi o Samoa, sa tautua foi i le Komiti Faafailautusi a le National I.C.T. Sector mo le ono tausaga, ae faapea foi i le Matagaluega o Fesootaiga ma Faamatalaga Televavave Faaneionapo (M.C.I.T.) i le tofiga o le Ofisa Sili Lagolago o Pulega. 

E 11 tausaga sa auauna ai i Faalapotopotoga Faavaomalo e aofia ai:

•        Faauluuluga o Vaega tau Poloketi mo le International Telecommunication Organization, I.T.U. i Geneva, Switzerland i le 2009 i le 2016. 

•        Avea ma Faufautua Faaitulagi i le Pasefika, i le Faalapotopotoga o Fesootaiga Faaneionapo a Malo o le Taupulega, i totonu o Peretania Tele mai le 2016 i le 2018. 

•        O le 2018 seia oo mai i le taimi nei, o loo avea o ia ma Faatonu o le Atina’e Tau Fesootaiga, i le Faalapotopotoga o Fesootaiga Faaneionapo a Malo o le Taupulega i Peretania Tele. 

•        Sui Failautusi Aoao o le Faalapotopotoga o Fesootaiga Faaneionapo a Malo o le Taupulega i Peretania Tele, mai lava i le 2018 seia oo mai i le asō. 

O Lematua, o lana nofoaiga lona lua lenei ta’i tolu tausaga.