Ua toe iai nei se malu o le Malo poo se leoleo e vaaia le saogalemu o le taitai o le Itu agai, ina ua tafa le finagalo o le Minisita, le Komesina ma le Matagaluega o Leoleo, Falepuipui ma le Tineimu, e toe faaauau lea tautua a malu o le Malo mo le susuga Tuilaepa L Sailele Malielegaoi.
Ua faailoa e le sui komesina o leoleo susuga Papalii Monalisa Tia’i Keti, o le gaioiga lea na tulai mai i le Aso Faraile ua mavae na osofai ai e se tina matua 79 tausaga o le soifua le susuga Tuilaepa, sa iloa ai i suesuega na faia, e tatau ona toe iai se Malu o le Malo e gafa ma le vaaia o le puipuiga o le taitai o le Itu agai.
Mo le silafia o le faasee ese o Tuilaepa sa avea ma Palemia ma lana faigamalo ina ua malolo i le palota tele o Aperila o le tausaga e 2021, na faaauau pea ona iai leoleo sa vaaia lona puipuiga, ae ina ua tuanai ni masina talu ona avea ma taitai o le Itu agai, na taofia ai ona toe faaauau lea tautua a malu o le Malo.
Na faatoa iai se auaunaga faapea a leoleo mo se Palemia o le atunuu i le taimi o avea ma taitai o le Malo le sui faipule o Lepa.
O le pale atu o le sui faipule o Lotofaga le afioga i le tamaitai Palemia, Fiame Naomi Mataafa ma le faigamalo a le Faatuatua i le Atua Samoa ua Tasi, na faia ai le faaiuga a le Kapeneta o le a le gata ina iai le puipuiga o le saogalemu a leoleo mo le Palemia ae a malaga foi i faatasiga ma fonotaga i atunuu i fafo, o le a iai foi le Malu o le Malo e vaaia lona puipuiga o le saogalemu.
O Tuilaepa le taitai muamua o se Itu agai, ua iai se tautua a Malu o le Malo mo le saogalemu.
