Ua toe fana a’e foi se isi auupega o le missile a Korea i Matu agai i le sami i le itu i Sasae o gataifale o le Korean Peninsula e pei ona lipotia mai e sui mai Korea i Saute ma Iapani.
O le faaono ai lea ona fanaina ane auupega a Korea i Matu i totonu o le 2 vaiaso ma ua faaosofia ai le lē fiafia o Amerika ma isi atunuu.
Ua faailoa mai e le Chief of Staff a Korea i Saute o le auupega lea na fana ane i le taeao analeila e le o faailoa maia le mamao na pa’ū agai iai.
Ua ta’ua i lipoti a le 9News se finagalo mai ia i latou e popoto faapitoa i nei tulaga e faapea o le auupega na fanaina i le asō e iai le avanoa e mafai ona oo atu ai i le teritori o Amerika, o Guam ma motu lalata ane.
O le auupega na faataitai ane e Korea i Matu i le Aso Lua o le vaiaso nei na valaau ai e Amerika, Peretania, Farani, Albanoa, Norway ma Aialani se fono faavavave a le UN Security Council.
