Ua toe faasalalau ai nei e le pulega o tagata faigaluega a le Malo, PSC Public Service Commission le avanoa faigaluega o le Ofisa Sili o le Matagaluega o Tiute ma Tupe Maua.

O le masina o Novema 2021 na avanoa ai le nofoa o le Oifsa Sili, peitai na faaauau mai lava e le Susuga Matafeo Avalisa Viali-Fautualii seia oo mai ia Fepuari 2022. 

I le 14 masina mulimuli ane, o loo faaauau lava ona feauaua’i Sui Ofisa Sili o le Matagaluega i le tofiga Ofisa Sili.

E oo mai ia Aokuso 2022, ua toe faatali le avanoa, ona o faatonuga mai le Kapeneta, e sootaga i se fuafuaga mo suiga i le Oifsa o Tiute ma Lafoga. 

E pei ona lipotia ia Iuni o le tausaga talu ai, na faasalalau ai e le MCR poo le Matagaluega o le Tiute ma Tupe Maua se avanoa mo le auaunaga faa Human Resource Consultancy.

E na te faia se fua faatatau ma le mataituina o le faatinoga o galuega, pe a tuu eseese le Matagaluega o Tiute ma Tupe Maua. 

E pei ona faamaonia ai e le Kaapeneta  (FK (22)  03), “O le fuafuaga a le malo e tuueseese le Matagaluega o iai nei a le Tiute  mai Tupe Maua, ina ia lua itutino eseese.

O se faiga e unaia ai le atoatoa o auaunaga ae o metotia siitia tulaga tau i le tamaoaiga. 

Peitai o le faasalalauga a le PSC mo se tasi e faigaluega i le avanoa Ofisa Sili o le Matagaluega o Tiute ma Tupe Maua, e faagata i le aso 3 o Fepuari. 

O le totogi o le CEO e i le va o le $121,000 ma le  $125,000.