Ua tuanai nai tausaga sa lē toe vaaia ma faalogoina ai le tapisa o tala o le taamilosaga liki kilikiti faasamoa pe a oo i le taimi o le Teuila, ina ua faia se faaiuga e taofia ae faaolaola le kilikiti faaperetania e maua ai tupe ma o se kilikiti o loo aloaia faavaomalo.

Peitai o lea ua toe faaolaola le tatou kilikiti samoa i le aga atu i le Teuila o lenei tausaga, e pei ona amata faagasolo ai i le vaiaso nei le taamilosaga mo ‘au e silia i le sefulu i lo tatou motu o Savaii.

O le faatamā o le asosi kilikiti a Salafai le afioga i le Minisita o Faatoaga ma Faigafaiva ma le Minisita o Aoga Taaloga ma Aganuu na o la tatalaina le taamilosaga i saunoaga, ma le naunautaiga ia toe fafagu mai lea taaloga ua masani ai le atunuu.

Le Minisita o Aoga Taaloga ma Aganuu, le afioga Seuula Ioane.

Ua faailoa e le faatamā o le taaloga kilikiti faasamoa i Savaii ua iai faailoga tupe mo ‘au o le a mau tulaga ae maua foi faailoga faapitoa mo isi vaega o le taamilosaga e pei o le polo mamao ma le ‘olo silia.

Le faatamā o le asosi kilikiti samoa i Salafai o le minisita foi o le kapeneta, susuga Laauli Leuatea Polataivao Fosi Schmidt.