Ua toe faamatuu foi faalauaitele se isi video fou o loo aofia mai ai ma le pailate Niu Sila o Philip Mehrtens lea o loo ave faamalosia pea e le vaega a le West Papua Liberation Army.

O le aso 7 o Fepuari na ave faamalosia ai Philip ma faatonuina i se tasi video na faamatuu mai muamua e faitau se faamatalaga mai lea kulupu ua ta’ua ai e le tatau ona toe iai ni pailate mai fafo e feoai atu i le faaitu lea ma galulue ai sei vagana ua tutoaasi Papua. 

E le o faasalalauina e le RNZ lea video ae i se taimi e lei mamao atu na ta’ua ai e se sui o le vaega o loo taofia le pailate o loo faatali mai i se tali atu a le faigamalo a Niu Sila e fetuunai ai le faasaolotoina mai o le alii pailate.