Ua toe faalogoina foi le valaau mo se puipuiga 24 itula i security guards i maota gasegase ina ua iai foi se isi faalavelave ua lipoti mai e toalua tausi soifua ma fomai e toatolu na faamanu’alia uma e se gasegase i le falemai i Port Pirie.
Faailoa e leoleo na valaau ane i latou i le mataupu lea i le itu i Matu o Ausetalia i Saute, ta’ua ai se gasegase e 75 tausaga na aofia ai sa faafaigata ona faafilemu.
E le o iai ni moliaga ua faia iai pe pueina foi se tasi ae fai mai se sooupu a le falemai ua toe foi i latou uma na aafia i galuega ae o se mataupu e ao lava ona silasila iai ma fai iai se faatatau.
E le o se taimi muamua foi lea ua aafia ai soifua o le aufaigaluega i maota gasegase i osofaiga poo gaioiga a gasegase ma nisi foi e agai atu i falemai ma e manatu le toatele ua alagatatau ona vaavaai le malo ma pulega o falemai aemaise leoleo i nisi auala e malu ai le puipuiga i soifua o nai nei tagata faigaluega o loo faatino lo latou tiute i le togafitia ma le fesoasoani i le mamalu o le atunuu e saili fesoasoani atu i falemai.
