Na faamalosia ona toe faafoi ane se faigamalaga a le Qantas mai Brisbane ma ua lipotia mai e le 7News e toalua le aufaigaluega ua i le falemai ona ua mānavaina se manogi ese mai le afi o le vaalele.
Ua ta’ua i le lipoti o le aufaigaluega ia i luga o le faigamalaga QF1798 a le Qantas sa malaga mai Brisbane i Rockhampton poo le ‘afa o le 8 i le po anapo.
E toalima le aufaigaluega i luga o le vaalele na togafitia i le taavale a le falemai ma le toalua na aveina atu i Prince Charles Hospital ma toe tetea i tua i le po anapo.
E lei iai se tasi o le pasese na afaina i le manogi na mānavaina e le aufaigaluega ma ua faailoa sa toe faaauau uma a latou faigamalaga i le taeao analeila.
E le o le taimi muamua lea ua toe faafoi ai ni malaga a le Qantas, o le masina na tea nei na toe faafoi ai foi se malaga mai Kuiniselani ina ua lipotia ua iai se faaletonu i le afi o le vaalele.
O loo suesue nei le faaletonu na alia’e i le malaga lea i le po anapo.
