Na toe foi faiaoga ma tamaiti aoga o le Botany Downs Secondary College e faaauau aoga i le aso ananafi i le mae’a ai o le Aso Lulu na lipotia ai le maua ane o se faamata’u i le aoga ma aveesea faavave ai i latou uma i le lotoā o le aoga ma logoina foi leoleo lea na o latou faatino suesuega ma faailoa ane ai o se taufaasese.
O le faamatalaga a le pule aoga ananafi i le One News ua ta’ua ai ona o tulaga lava o le puipuiga na mafua ai gaioiga i le Aso Lulu ma o le aso ananafi na toe faagasolo ai aoga e pei ona masani ai ma ua petolo foi leoleo i auafa o le aoga ma le lotoifale lea e faaauau a latou suesuega.
Sa faafetaia e le pule aoga, Karen Brinsden le galulue faatasi o faiaoga ma tamaiti aoga i le fuafuaga na iai i le Aso Lulu ma sa saogalemu tagata uma.
O loo lipotia foi e tali tutusa lava ma le tulaga na tupu foi i le aoga a le Western Springs College i le Aso Lulu fai mai na aveesea faavave mai ai foi tagata uma sa i le lotoā ona o se faamata’u, ma sa faamaonia mai e le pule, Ivan Davies i le aufaasalalau e leai se pomu sa iai i le aoga.
