Ua faaui i tua mai le faamasinoga faaitumalo le tagi o tuuaiga o faiga faaalatua le bribery na faaulu e le tofa Vaaaoao Alofipo, o le failautusi o le vaega faaupufai o le Faatuatua i le Atua Samoa ua Tasi poo le FAST, sa tuua’ia ai le faipule o Faleata 3 o le failautusi o le faafaletui o le vaega e puipuia aiātatau a tagata le tofa Lealailepule Rimoni Aiafi.

Ua faailoa mai e le loia sa tauaveina le tagi, le tofa Laga’aia Fetu Iupati Laga’aia ua faaui i tua e Vaaaoao le mataupu ona e tutusa lava ma moliaga o Lealailepule sa finauina i le faamasinoga o tagi tau palota lea na faaleaogaina ina ua lē mafai ona faamaonia mau na tuuina atu e lagolago ai.

O molimau lava e tasi ma o le taunuuga foi e tasi e ono taunuu iai le mataupu, e ui e ese le faamasinoga o tagi tau palota ese le faamasinoga o soligatulafono.

Ua talia e le itu sa faasaga iai tagi le toe ave i tua o moliaga ma ua faaleaoga ai e le faamasinoga lenei mataupu.

Ua totoe ai nei le tagi faapenei o loo molia ai ni faipule o le Faatuatua i le Atua Samoa ua Tasi e aofia ai le Palemia, ma le failautusi o lea pati faaupufai.

O le masina o Aokuso o le a valaau ai molimau.