O le asiasi mai ai i lo tatou atunuu o le siamupini o faipelega a le lalolagi i le paga o le Cruiser Weight le susuga Jai Opetaia ma lona aiga, sa ia asia ai nisi o a’oga i le atunuu faapea lona toe afea o le nofoaga o loo faamautū ai fanau a le atunuu ua sauāina, le nofoaga o le Campus of Hope i Tuanaimato.
Sa ia faia ai se foa’i o taumafa mo le nofoaga ma feiloa’i atu foi ia i latou o loo vaaia le nofoaga aemaise o fanau o loo tausia ai.
O le toe asiasi mai i le atunuu o Jai Opetaia o se isi lea o vaega o ana mālōlōga a o tālia ai se isi ana fusuaga.
Faaalia e lea alo o le atunuu ina ua feiloa’i ma tusitala i le vaiaso na te’a nei, o le faia o sona suafa matai e pei o le tasi o tamafusu lauiloa le susuga Lupesoliai Joseph Parker, o se filifiliga e faato’ā ia faia pe a mae’a ona ia sa’ili’ili loloto i le tāua o lea vaega o a tatou tu ma aganuu.
