Ua toe a’e uma i le vaiaso nei a’oga i le atunuu i le tuanai o le lua vaiaso o malologa o le tuuaga ma le vaiaso faaopoopo e tasi na mafua ona o le tau faaitiitia o le pipisi o le flu le influenza B ua aafia ai le toatele o fanau e i lalo o le 15 tausaga le matutua.

E lei toe maua se lipoti lata mai a le soifua maloloina po ua iai se suiga i le numera o fanau o taofia i falemai ona o āuga tigaina o le flu, ae o le toe a’e o aoga ua ave ai le fautuaga a le Matagaluega o Aoga Taaloga ma Aganuu i aoga uma a le malo o ekalesia, ma aoga tuma’oti ina ia faamalosia le faia o punifofoga o fanau ma tagata uma e oo i faiaoga, faapea tagata e ulufale atu i lotoa ma ofisa o aoga taitasi.

O le fautuaga foi lea ua faamalosia ai le faia o puipuiga o le tumamā lautele ina ia taofia ai le pipisi o auga o le faama’i flu.