E toatolu alo o Samoa ua faamaonia mai o le a taaalo i le taaloga o le sailiga siamupini o le a faia i le Aso Sa nei, 12 o Fepuari, le Super Bowl i le va o le Philadelphia Eagles ma le Kansas City Chiefs.
O alii Samoa nei o John Sherman (JuJu) Smith-Shuster, Isaac Seumalo, ma Jordan Mailata.
JuJu Smith-Schuster – (fanau ia Novema 22, 1996) O le alii o John Sherman e lauiloa i lona igoa valaau o JuJu, e taalo i le tulaga o le Wide Receiver, mo le Kansas City Chiefs o le NRL. I le 2017 na faatulaga ai o ia le tama taalo pito laititi, e 20 ona tausaga, i le faatulagaina o tama na taaalo i le National Football League (NFL). O le 2017 foi na faaeaina ai le alii o JuJu Smith-Schuster i le faailoga o le 2017 Polynesian Pro Football Player of the Year Award e le kamupani vaalele a le Hawaiian Airlines i le taimi o le Polynesian Football Hall of Fame Celebration Dinner.
Isaac Seumalo – (fanau ia Oketopa 29, 1993) O le alii talavou o Isaac Seumalo e taalo i le Philadelphia Eagles mo le NFL. O se alii na fanau i Honolulu Hawaii, ae na soifua ane i Corvallis i Oregon, ma na aoga i le Corvallis High School o iina na amata ai ona taalo i le lakapi faa-Amerika. Na aoga foi Isaac i le Oregon State University. Na ia filifili e taalo lakapi mai le Setete o Oregon, o le setete lea sa galue ai foi lona tamā o Joe Seumalo o se faiaoga, defensive line coach i le San Jose State University.
I le uluai vaitau na taalo ai Seumalo mo le Setete o Oregon, na avea ai o ia ma first true freshman e amata taalo i le tulaga o le center talu mai le isi foi alo o Samoa na taalo ai i lea tulaga, le susuga Roger Levasa i le tausaga 1978, ma na taalo ai Seumalo i taaloga uma e 13 ma faaeaina ai i Freshman All-American honors e le College Football News ma le CBSSports.com. Sa viiviia foi Seumalo i le maoa’e o lana taalo i le la fesaga’iga ma le Pac-12 Defensive Lineman of the Year, le alii o Star Lotulelei, lea na manumalo ai lana ‘au i le Utah Utes.
O ia o se atalii i ona mātua o Joe ma Karen Seumalo ma o se tasi mai le fanau e toalima a ona mātua.
Jordan Mailata – (fanau ia Mati 31, 1997) O le alii talavou mai Ausetalia, o Lafoga Jordan Mailata, ua 25 ona tausaga, ma ua tulai mai o se tasi ua matuā iloga lana taalo i le ‘au malosi a le Philadelphia Eagles talu mai ona auai atu i ai ia Me o le 2018. O loo taalo Mailata i le tulaga o le offensive tackle. A o lei agai atu i Amerika e taalo ai, sa muai taalo Mailata mo le Canterbury-Bankstown Bulldogs i le vaega o le Under-18 ma sa taalo foi mo le ‘au Under-20 o le South Sydney Rabbitohs.
E ese mai le taleni lakapi a Mailata ua ta’uta’ua ai nei i le NFL aemaise le saofagā atu e taalo i le taaloga sili ona faitaulia a le NFL, le Super Bowl o le a faia i le Aso Sa, 12 o Fepuari, ae e manatua foi le alii talavou i lana taleni o le pese e pei ona sa pepese toalua ai ma le tamaitai o Rachel Small i le tauvaga X-Factor ma na oo lava i le final e ui e lei manumalo ai.
O Mailata na tuputupu ane i le pitonuu o Bankstown i Sini Ausetalia, ma na aoga i Condell Park High School, i lena pitonuu o Bankstown, e tele ina nonofo ai tagata e maulalo le tamaoaiga, aemaise lava aiga mai Lepanona, Arapi ma tagata mai motu o le Pasefika. Na faailoga ina ua fanau mai i lona igoa o Lafoga, ae na faaigoa e lona tuafafine i lona igoa lona lua o Jordan e manatua ai le alii ta’uta’ua i le taaloga basketball, o Michael Jordan.
I le tuputupu ane o Mailata i Sini Ausetalia, e tele ana galuega sa faigaluega ai i le ono tausaga talu ai; o se tama talavou se faigaluega e teu oloa i se supamaketi, sa galue foi o se scaffolder, na galue fesoasoani i galuega faakamuta, ma isi lava mau galuega eseese ina ia maua ai se tupe e fesoasoani i lona aiga i le totogia o a latou pili masani, a o taumafai ia ausia lona sili e fia taalo i le lakapi faapolofesa i lona atunuu.
E lei kolosi i le mafaufau o Mailata i lena taimi sona oo atu e saini se konekarate e oo i le fia miliona tala tupe o le a ia maua ai, e ui na iai nisi sa faailoa ia te ia e ono oo lona olaga i le ituaiga lakapi lea pe a fua i le laulauā o le tino o lenei alii ma lona malosi.
I le taimi nei ua mautinoa le $40.8 miliona lea ua saini ai le alii Samoa o Jordan Mailata aemaise o le a taalo ai nei i le Super Bowl i lana ‘au o le a fetaui ma le ‘au a le Kansas City Chiefs ma se aofaiga pe a ma le 200 miliona tagata o le a maimoaina lena taaloga mataina.
Na malaga mai Samoa mātua o lenei alii e saili se lumanai mo le la fanau e toalima e aofia ai ma Jordan ma o le tulai mai o Jordan i lana taleni lakapi, o se moemitiga sa lei mafaufauina o le a vave ona tino mai, ae maeu foi le saili malo o lenei alii Samoa.
NFL Super Bowl – Talaaga
O le Super Bowl o se taaloga suega siamupini e faatasi ona faia i le tausaga a le U.S. National Football League poo le NFL.
O le taaloga lea e fetaui ai ‘au manumalo mai suega siamupini o le NFL a le American Football Conference ma le National Football Conference, ma e masani ona faia ia Ianuari poo Fepuari i tausaga taitasi, ma o tausaga taitasi e fesuisuiai lava aai e talimalo ai.
O le uluai Super Bowl na faia i le aso 15 o Ianuari i le 1967, na mafua mai ina ua tuufaatasia le National Football League (NFL) ma le American Football League (AFL), lea na ta’ua muamua o le “AFL-NFL World Championship Game”.
O le uluai Super Bowl i le 1967 na taaalo ai le Green Bay Packers a le NFL ma le Kansas City Chiefs a le AFL ma na manumalo le Packers i ‘ai e 35 i le 10 a le Chiefs.
O le suega siamupini foi lea a le Super Bowl e matuā mata’ina ona o faafiafiaga e faia i le taimi e malolo ai le ‘afa muamua o le taaloga. I le amataga mai sa masani ona faafiafia ai solo a fa’ilipu, o faafiafiaga a le vaega o le militeri ma isi lava vaega faafiafia, peitai a o faagasolo mai taimi ua amata foi ona suia ai faiga o faafiafiaga, ua matele i tagata pepese ma isi tagata faafiafia lauiloa e pei foi ona faafiafia ai tamaitai siva ma pepese lauiloa o Beyonce, Gaga, Whitney ma isi.
O taimi foi o le Super Bowl e matuā oso maualuga ai faasalalauga faalauiloa a kamupani a le au faitelevise i tausaga taitasi talu mai lava ona amata nei taaloga i le 1967. Ma o le taimi foi lena e matuā taugata ai lava le tau e totogi mo nei faasalalauga faapisinisi mo soo se fale televise.
Mo se faataitaiga, i le 2016, e tusa ma le $4.8 miliona le tau mo se faasalalauga faapisinisi e na o le 30 sekone le umi. Ma o le tulaga lea ua iai le Super Bowl, e tutusa lava le fiafia o tagata e maimoa lenei taaloga ma le fiafia e matamata i faasalalauga faapisinisi e faia ai i lena taimi, aemaise lava ina ua mae’a le ad maoa’e a le kamupani a le Apple i le 1984.
