E toaono tina mau paolo i le polokalame o le Nofotane o loo auai i le atinae o pisinisi laiti mo lo latou lumanai manuia, ua maua ni faailoga faapitoa i le lelei o le tulaga o a latou pisinisi, ma ua maua le tai limaselau tala Amerika.
Ua auala mai lea faailoga faapitoa ma le seleni i le galuega fai faatasi a le faalapotopotoga o le Toomaga mo ē Puapuagatia ma le tasi o polokalame fesoasoani a Malo Aufaatasi o le United Nations Economic and Social Commission for Asia and the Pacific poo le UN ESCAP.
Ua faailoa e le Toomaga mo ē Puapuagatia i se pepa o faamatalaga faalauaitele, e toa selau tina faipisinisi o le polokalame o le Nofotane sa auai i se faatasiga tau aoaoga e fesoasoani ai ia latou atinae tau pisinisi, ae e 40 tina na talosaga i le polokalame o le Fatu Toa mo ni faailoga faapitoa lea ua faamanuiaina ai tina e toaono, toalua mai Savaii ma le toafā i Upolu.
Ua oo i le 2 afe le aofaiga o tina o le atunuu ua avea ma sui auai o le polokalame o le Nofotane a le Toomaga mo ē Puapuagatia.
