O le faaiuga o galuega o lenei vaiaso e tuua aloaia ai e afioga i Faamasino e toalua o Peresetene lagolago foi o le Faamasinoga o Fanua ma Suafa, o la tofiga ina ua malolo litaea ma ua aloaia foi i se faaiuga a le Komisi o galuega a lea faamasinoga tāua a lo tatou atunuu.
O le afioga Luamanuvae Palesoo Asera, ma le afioga Tauaaletoa Poe Ualesi ua aulia le tai 70 tausaga o le soifua ma o ni tamalii sa tele lo la sao tāua i le faafoeina o faamasinoga tau fanua samoa ma suafa matai o le atunuu, e pei ona silia i le 18 tausaga o galue le afioga Luamanuvae Palesoo Asera, ae silia i le 14 tausaga o tautua le afioga Tauaaletoa Poe Ualesi.
Ua faamaonia mai e le Ofisa Sili o pulega o le Matagaluega o Faamasinoga ma le Faafoeina o mataupu tau faamasinoga le susuga Papalii John Taimalelagi Afele, le faia ai o se faamavaega i le Aso Tofi o lenei vaiaso a lafioga i alii ma tamaitai faamasino ma le matagaluega ma ia faamasino sinia sa tauaveina tulaga tofi o le Sui Peresetene lea ua suia nei i le Peresetene lagolago i aiaiga o le Tulafono o Faamasinoga o Fanua ma Suafa o le tausaga 2020, a o lei tuua le galuega i le Aso Faraile o le vaiaso nei lava.
O le afioga Luamanuvae Palesoo Asera sa avea muamua ma Lesitala o lea faamasinoga ma faauluulu iai lea tautua i tausaga ua mavae, a o lei filifilia e avea ma faamasino.
O le afioga Tauaaletoa Poe Ualesi sa tautua i le Matagaluega o leoleo ma falepuipui ma avea ai ma se tasi o Komesina lagolago, a o lei filifilia e avea ma faamasino o le Faamasinoga o Fanua ma Suafa a Samoa.
