E toalua faamasino sinia o le Faamasinoga o Fanua ma Suafa ua filifilia e avea ma Peresetene Lagolago ma ua tapena le sauniga o le faatautoina o i laua, le afioga Leaupepe Fatu Pula, ma le afioga Masinalupe Tusipa Masinalupe.
Ua tauave e ia faamasino sinia le tulaga Peresetene Lagolago sa seei ai afioga i Faamasino sinia ua malolo litaea le afioga Luamanuvae Palesoo Asera ma le afioga Tauaaletoa Tuitoga Poe Ualesi.
O se fesootaiga ma le Ofisa Sili o le pulega o le Matagaluega o Faamasinoga ma le faafoeina o mataupu tau faamasinoga i le Aso Lulu o le vaiaso nei, na faailoa ai lea filifiliga i totonu o galuega a le Faamasinoga o Fanua ma Suafa.
Ua faailoa foi e le Ofisa Sili o le pulega le susuga Papalii John Taimalelagi Afelē, ua mae’a faamautu le faaiuga a le Komisi o galuega a le Faamasinoga o Fanua ma Suafa i le filifilia o se Sui Pelesetene e lagolago i le galuega a le Peresetene, ae o loo tālia le faaiuga a le Kapeneta ua fautuaina ai le afioga i le Ao o le Malo mo le faamaonia o le filifilia o se tamalii o se loia e avea ma sui Peresetene.
Ua faailoa e le susuga Papalii e faatoa faailoa le suafa o lē ua filifilia pe a tauaao e le Komisi o galuega a lea faamasinoga le faaiuga aloaia mai le Kapeneta.
Ae mo Peresetene lagolago e toalua ua filifilia o le Aso Gafua o le vaiaso asau e faatauto ai mo le tauaveina o ia tulaga tofi sinia o le Faamasinoga o Fanua ma Suafa Samoa.
Mo le tofi Sui Peresetene o lea faamasinoga tāua a le atunuu ua faamoemoe e faatauto i le Aso Gafua le aso 20 o Fepuari, ma o lea sauniga o le a faia i le Maota Faamasino autu i Mulinuu.
