E lua pepe teine na soifua mai ma ulufale i lenei lalolagi i le Tausaga Fou 2023 ma o le pepe muamua na fanau i le falemai i Tuasivi i Savaii pe tusa o le itula e 5 o le vaveao o le Aso Sa le aso muamua o Ianuari, ae o le pepe lona lua na fanau i le maota gasegase i Motootua i le 16 minute e tea ai le lima i le vaveao lava o le aso muamua o le Tausaga Fou.

E iai le talitonuga o le a maua faamaumauga o pepe na fananau i le uluai aso o Ianuari 2023 pe a maua uma faamaumauga mai sui o nuu poo pulenuu ma sui tamaitai o nuu ma afioaga, faapea falemai faaitumalo i le atunuu pe a toe a’e uma galuega a le Malo i le vaiaso asau, ae mo le vaiaso muamua lenei o Ianuari na pau ia o pepe ua faamauina e le matagaluega o le soifua maloloina.

O le pepe teine na fanau i le falemai i Tuasivi e 7 pauna le mamafa ae o le pepe na fanau i Motootua e valu pauna.