Ua tapena se tauaofiaga faapitoa a le Faamasinoga poo se special sitting, ua faatulaga mo le amataga o galuega o le vaiaso asau i le faamoemoe, e faamavae atu ai i afioga i faamasino e toalua o le faamasinoga o talosaga apili a le faamasinoga maualuga.
O ia faamasino e toalua mai Niu Sila o le afioga Justice Robert Fisher ma Justice Peter Blanchard.
O le tausaga e 2021 i le masina o Aokuso na filifilia ai e le komisi o galuega a le faamasinoga ni faamasino se toalima mai le faamasinoga maualuga a Niu Sila ua malolo litaea e tauaveina tofiga faamasino o le faamasinoga sili a lo tatou atunuu mo le umi e 2 tausaga ma sa aofia ai ma afioga i Faamasino e toalua o le a faamuta o la taimi galulue i le faamasinoga a lo tatou atunuu.
O ia faamasino e toalima na filifilia sa tauaveina foi galuega a le faamasinoga o talosaga toe iloilo a Samoa, lea e toe iloiloina ni faaiuga e toe apili a le faamasinoga maualuga.
