O loo filogia alo e toalua o Samoa i atunuu e 90 o le lalolagi lea o loo tauva i Netherlands i le faamoemoe a le lalolagi o tuuga vaafailā.
O Vaimo’oi’a Astrid Ripley ma Eroni Leilua o i laua nei o loo tauaveina le tagavai o le atunuu i lenei faagatama ua faaigoaina o le Allianz Sailing World Championship.
Na faailoa e nei sui ia la tapenaga o loo iai i Netherlands.
“O loo gasolo lelei tapenaga mo le faamoemoe o loo vaaia le tulaga malolosi o savili ma le sou o le sami o se vaega e ao ina nofo sauni ai.”
E pei ona faailoa i upega o faamatalaga a Leilua o le aso muamua o lana taumafaiga e lei tulaga lelei ma na ia tapena e toe tulitatao i le aso lona lua lana taumafaiga ae peitai e lei faataunuuina ona o le tulaga i le sou ma o se taimi muamua lea ua ia molimauina ai le tulaga ese o le aave o le sami.
E lua taaloga o le a tauva ai Leilua ma o loo fuafua e ono tulaga lelei ai le tai mo lenei faamoemoe.
O Ripley ma Leilua o i laua foi ia o le a fai ma sui o Samoa i lenei faagatama i taaloga o le Pasefika o le tausaga nei.
O lenei faamoemoe o loo faagasolo i le vaiaso nei ma e faamaeaina i le vaiaso fou.
