E to’alima tusitala mai Samoa o nisi e galulue i fale televise ma leitio a le malo ma le vaega tumaoti, e auai i se a’oa’oga faamasani i le faatinoga o se tasi o auaunaga faasalalau o le faatalanoaina o ta’ita’i o le malo ma e lotolotoi i auaunaga mo galuega o le atinae manuia o tagata o se atunuu.
O se tasi lea o avanoa ua aumai e le polokalame fesoasoani a le malo o Ausetalia mo le faaleleia o galuega faatusitala ma faasalalau i atunuu o le pasefika i le faamoemoe e saga tapu’e atili le tomai i le faatinoga o lea tautua.
O i latou ua filifilia mo lea a’oa’oga faamasani o Matauaina Isaako o le TV9 ma le leitio o le 2AP, Leota Marck Membrere o le Ofisa Sooupu ma Faasalalauga a le malo i le nusipepa o le Savali, Yumi Talaave Epati o loo tautua o se faiaoga i le tomai faatusitala ma faasalalau i le Iunivesite Aoao o Samoa, Joachim Smith o le TV1 i Mulinuu ma Seiuli Francis Vainalepa o le NUS TV poo le televise a le Iunivesite Aoao a Samoa.
Seiuli Frances Vainalepa Photo: J.A.W.S
E amata lea aoaoga faamasani i ofisa o le malo Ausetalia i Canberra ae faaiu atu i Brisbane. O le vaveao o le Aso Gafua o lenei vaiaso na tuua ai e ia tusitala le atunuu.
