O le aso lona lua talu ona a’e le kuata tolu o aoga a fanau o lenei tausaga faaleaoaoga, ae o lea ua talanoa le ono aooga mai o fanau mai le fale.
O le to’agaogao o faiaoga ma le fiu o aoga e saili nisi faiaoga o le mafuaaga lea o le ono faamalosia o fanau aoga e faaauau mai aoga mai le fale.
Ua māua e tala fou o nisi o aoga o lea ua saili mai atunuu mamao nisi faiaoga e pei ona faia e le aoga maualuga a Greymouth, ma i lipoti a le Newshub o lea faatoa atoa lea o faiaoga o le kolisi mo le uluai taimi i lenei tausaga.
E molimau ai le peresetene a le asosi o faiaoga o aoga maualuluga, o le faafitauli tele lea o loo iai nei o le lē lava o faiaoga ma ua tutusa ai lava ma isi pisinisi o loo paso e saili ni tagata faigaluega.
Ua sau ai ma le lapataiga e ono oo i le tulaga o le aooga mai i le fale fanau poo le faamoemoe i atunuu i fafo e saili mai ai nisi faiaoga.
