E le o toe umi ni vaiaso o le masina lenei o Iuni, ona faamuta lea o le toe agai i le maota gasegase tutotonu o Tupua Tamasese Meaole o gasegase tau savali, mo le faia o suesuega faafoma’i e faaaoga ai le fā’ata o le ultra-sound.
O le amataga o le masina fou o Iulai o le a tapunia ai lea auaunaga a le soifua maloloina i Motootua, ae agai uma gasegase tau sāvali i auaunaga tau soifua maloloina tuma’oti, poo foma’i o loo faagaioia a latou pisinisi ma iai lea masini fā’ata e vaai ai o latou gasegase.
Ua faaalia e le faatonu sili o le soifua maloloina le susuga Aiono Dr Alec Ekeroma i se faasilasilaga faalauaitele, ua faatupulaia gasegase tigaina i le falemai i Motootua ma isi falemai faaitumalo, ma ua to’agaogao foi le aufaigaluega.
E le o iloa pe totogi e le matagaluega o le soifua maloloina le faia o le fāa’ta lea i auaunaga tuma’oti, pe totogi lava e le gasegase lona fā’ata ultra-sound.
