E toafa tagata ua molia i le faalavelave ua manua tigaina ai se alii o loo feta’ua’ina na ave faamalosi e nisi.
O Stanmore Bay i Aukilani na tupu ai le faalavelave i le aso 2 o le masina lenei o Ianuari e pei ona faamaonia e leoleo i se pepa o faamatalaga.
O faamaumauga la mai le faamasinoga o loo ta’ua ai o ē ua tuuaia, e toalua alii toalua tamaitai e i le va o le 27-36 tausaga le matutua ma ua molia nei e pei ona feta’ua’ina i le aveina o se alii ma taofia e aunoa ma sona malie iai.
O loo feta’ua’ina foi na o latou faaoolima i lea tagata e faaaoga ai se fana paipa.
E toalua la ua molia i le umia o se auupega o se fana , o le isi o loo molia i le taofia o leoleo mai le faatinoina o se poloaiga mo suesuega.
Fai mai leoleo e ogaoga le mataupu lenei ma e tigaina foi manuaga o lē ua aafia ma ua aveina atu i le falemai.
Ua i luma o le faamasinoga le mataupu ma o le a tulai i latou ua tuuaia i le faamasinoga i North Shore i se aso mulimuli o le masina nei o Ianuari.
