O le salalau o se ata video na pue i se telefoni feaveai na iloa ai se gaioiga tau faaoolima, na aafia ai ni tama tane talavou se toalua, na faaaogā e leoleo lea ata e faia ai a latou sailiga ma maua ai ni taulelea se toafā ua taofia ma molia ona o lea gaioiga solitulafono.
Ua molia foi ia alii i le solitulafono o le faomea poo le robbery.
E lei tele ni faamatalaga ua faailoa e leoleo i le mataupu lenei ona o loo faaauau pea suesuega, ae o le tuanai ona salalau o lea ata video i luga o le api o foliga, na taotaotua mai ai ma nisi ata video o ni gaioiga tau faaoolima foi.
O ia vaaiga sa pueina i le nofoaga faatali pasi i Savalalo faapea ma se isi faaoogalima i se taulealea talavou i se nuu e lē o iloa.
Ua aumai ai se faamatalaga faalauaitele mai leoleo ma faailoa ai o loo faia iai ni suesuega.
Ua faailoa foi e leoleo e matuā lē talia lava ia faiga solitulafono.
O loo vaaia i se tasi o ata pue ni tagata ua matutua soifua o loo iai i le taimi o le faaoolima ae aunoa ma se fautuaga poo se tuualalo e taofia ai.
