E 175 atunuu o le lalolagi e aofia ai ma Samoa na tauva i le tauvaga aau a le lalolagi lea na faia i Fukuoka i Iapani i le masina nei.

O i latou nei o Brandon Schuster, Olivia Borg, Kokoro Frost ma Kaiya Luana Brown sa tauva i le 50 ma le 100 mita i le vaega o le freestyle ma le butterfly faatasi ai ma la latou faiaoga o Suzie Schuster.

Na faailoa e Schuster o se tasi lenei o tauvaga faavaomalo o loo vaaia ai pea le agai i luma o le taumafai a alo o le atunuu.

“Faafetai i le taumafaiga a nai fanau i lenei tauvaga o loo vaaia ai pea o loo agai i luma.

“Olivia Borg o loo tulaga 40 i le lalolagi mo le 50 mita i le butterly division, o Kokoro Frost i lana taumafaiga lea ua ia ausia ai le national record i le 50 mita i le butrerly division ma le alii o Brandon Schuster lea na tulaga muamua i le heat muamua o le freestly 50 mita ma o loo ia tausisi lava i le national record time.”

Na saunoa Schuster o le tulaga lea o le taumafai mai ai o le taaloga aau i Samoa mai le tele o tausaga ua mavae seia oo mai i le taimi nei.

“O loo vevela le tulaga o le atina’e o le taaloga lenei i le atunuu ina ua toe tatala faitotoa o faleaau i Tuanaimato sa tapunia mai ona o le faama’i o le koviti.

“Ina ua mae’a taaloga o le Pasefika i le 2019 lea na tulaga mataina ai le taumafaiga a le ‘au aau a Samoa i le 17 pine e aofia ai ma pine auro e 5 sa agai malosi ai le unaia o polokalame eseese e lē gata i aoga ae o le vasega o faiaoga e aoaoina ai iai le tomai ma le agavaa e toleni ai le a’u.”

O le taimi nei na faailoa ai e le faiaoga o le ‘au aau a Samoa ua silia ma le 200 fanau i le 2-20 tausaga o loo atina’e pea i lenei taaloga.

Ae filogia ai lava ma faafitauli o loo feagai ma le ‘au o loo taumafai ina ia foia.

“E tofu lava le taaloga ma ona ia faafitauli o le ‘au aau lava ia e iai lava nisi o tulaga e ao ina foia e pei o le tulaga i seleni e faaaogaina i faamoemoe faapenei ma nisi o polokalame, o avanoa mo fanau nei o iai le taleni e fesoasoani faalauaitele ai le taleni aau, o le itu tau resources faatasi ai ma le lagolagoina o lenei taaloga.”

O loo tele nisi o taamilosaga faavaomalo o loo tapena ai le ‘au a Samoa mo le tausaga nei ma le tausaga fou e pei o Taaloga Tupulaga Talavou a Malo o le Taupulega e faia i Trinidad lea ua mae’a filifilina ai le toatolu a le ‘au a Samoa ona sosoo ai lea ma taaloga a le Pasefika ia Novema ae o loo faagasolo pea i latou o loo tau amata i le taaloga i nisi o tauvaga i Fiti ina ia fesoasoani ia i latou.