O lea ua toe faaauau le tatala o nisi o le au nofosala o loo tuli faasalaga i le falepuipui i Tanumalala e asiasi i o latou aiga i faaiuga o vaiaso.
O le amataga o le tausaga nei na toe faatino ai lea faiga na sau a’i i le tele o tausaga ua mavae talu ona taofia le toe Aso Sa o pagota i o latou aiga i le 2 tausaga ua tuanai. O le lotu o tamaiti o se Aso Sa taua tele i totonu o Samoa ma ua fetaui ai le Aso Sa o le fanau o lenei tausaga ma le asiasi o le to’a 64 o pagota i o latou nuu ma aiga.
I le faailoaina o lea tulaga e le Sui Komesina o le Matagaluega o Leoleo le afioga Auapaau Logoitino Filipo i se feiloaiga ma tusitala ma ia faailoa ai o le au nofosala ua maua le avanoa ua filifili mai iai latou o loo lelei le tuliina o faasalaga e pei o le lelei o le amio ma usitai i aiaiga o le tuliina o faasalaga. O nisi foi o ia pagota ua maua le avanoa e galulue ai i tua mai le falepuipui ma nisi o loo galulue i le faamamaina o le taulaga.
Ua iai se fesootaiga a le Matagaluega o
leoleo ma Alii ma Faipule faapea foi Faafeagaiga o nuu ma afioaga o loo asiasi iai le
to’a 64 o pagota ma ua fausia ai se fesootaiga i le vaaia o i latou ao asiasi ai i o latou aiga aemaise foi na fesootai muamua leoleo i aiga o i latou ma faailoa ai pe latou te talia le Aso Sa atu o tagata o latou aiga.
O le Aso Lua pe a maea le Aso Gafua malolo e faamamalu ai le Aso Sa Pa’epa’e o le fanau e toe foi uma atu ai i latou nei i le falepuipui. O i latou o loo nofosala i soligatulafono matuiā ma ogaoga e pei o le faaoo o le maliu i se tagata ma solitulafono tau fai aiga e lē mafai ona maua lenei avanoa.
