E toasefulu leoleo poo Malu o le Malo e aofia ai tamaitai e toalua ma alii e toavalu, ua filifilia i le isi vaega o leoleo e malaga mo le faatinoina o tiute o le puipuiga o le filemu a Malo Aufaatasi poo UN Peace Keeping Mission.
O le faatoa toe malaga lea o ni Malu o le Malo mo aoaoga i le faatinoina o ia tiute o le puipuiga o le filemu, talu mai le tausaga e 2020 e mafua ona o vavao sa tapunia ai malaga masani ona o le faamai Koviti-19.
E tolu vaiaso o le a feagai ai le aumalaga ma aoaoga i le atunuu o Indonesia ona faatali ai lea i se taimi e maua ai le valaau mo se atunuu o le a galulue ai.
O le tausaga nei ua atoa iai le 23 tausaga talu ona ofi Samoa i tiute o le puipuiga o le filemu a Malo Aufaatasi.
O atunuu ua galulue ai Malu o le Malo mo le faatinoina o ia galuega, o Timor – Leste, Darfur, Liberia, Sudan ma South Sudan.
