O loo talanoa le toatele o tagata i Ausetalia i le asō i se faalavelave ua lipotia mai Brisbane, o se tamaitai e 39 tausaga ma le teineititi 11 tausaga o loo taofia uma i le falemai ona o manu’aga na tatui ai se’i tulou e se tamaititi 16 tausaga le matua i le po anapo e pei ona feta’ua’ina.
O le faamatalaga a leoleo e faapea o le toalua o loo manunu’a na maua atu i se fale i Rosewood i le itu i Sisifo o Brisbane ina ua valaau ane mo se fesoasoani i le tea o le 10 i le po.
O loo taofia le teineititi 11 tausaga i le Queensland Children’s Hospital ae o le tamaitai 39 tausaga o loo i le Royal Brisbane Hospital ae ua faailoa o le tamaititi ua pueina e leoleo e nofo ai foi i le fale na tupu ai le faalavelave.
O lipoti a le 9News ua ta’ua ai o le tamaititi 16 tausaga o le tama a le tina lea e 39 tausaga, o lona uiga o lona tina ma lona tuafafine lea o loo aafia.
O loo faatalia i se taimi e lē o toe mamao se lipoti aloaia a leoleo i lenei faalavelave.
