Fai mai ua savavali ese mai mai le tauvaga e sa’ilia ai se Miss Universe o lenei tausaga nisi o tama’ita’i tauva ina ua upuia e se tasi o ofisa o le tauvaga le tama’ita’i tauva mai Mexico.
O le atunuu o Thailand lea o loo talimalo i le tauvaga ma o se tasi o vaega o le polokalame pre-pageant ceremony sa faia, na faia ai ia faamatalaga e le faatonu o le Miss Universe i Thailand aga’i i le tama’ita’i tauva a Mexico a o faalogologo uma iai isi tama’ita’i tauva.
Fai mai le BBC ina ua toe tali atu iai le tama’ita’i Mexico i le alii faatonu sa ia faafefe o le a faalēaogāina lona avanoa ma isi o loo lagolago ia te ia.
Ua alu i luga o le social media ma upega tafa’ilagi le video o le fesaga’iga lea ma ua faailoa foi le lē fiafia ma le lē taliaina e le faalapotopotoga o le Miss Universe o lea amioga a le alii faatonu o Nawat e ui ua mae’a ona ia faatoese.
Ua faailoa e se sooupu mai le Miss Universe Organisation ua lē manuia amioga faaalia a Nawat ma toe faamanatu ai e le faalapotopotoga o le faamoemoe lea o le Miss Universe o se platform e faamalosia atili ai tama’ita’i ina ia faailoa o latou leo i le lalolagi.
O le tama’ita’i o loo avea nei ma Miss Universe, o Victoria Kjaer mai Denmark, o ia le isi na aga’i ese mai mai le tauvaga, fai mai a ia o le matāupu lea e faatatau i aiā tatau a tama’ita’i ma e lē o le auala lea e tatau ona faatino ai le faiga o mea.
O le aso 21 o Novema e tatau ona faapale ai le isi Miss Universe ma ua toe faaauau le tauvaga ae ua faasee ese le alii o Nawat lea fai mai le to’atele ua lē tatau lava ona toe tuu i se tofiga faapea ae sili le sa’ili o se isi ana galuega.
Puna o Faamatalaga: https://www.bbc.com/news/articles/cy40q990g28o
