Ua faatulaga nei o Iuni o le tausaga fou 2025 o le a su’esu’e ai moliaga a leoleo e pei o le solitulafono o le ave faamalosi o se teineitiiti 17 tausaga le matua, o loo tuua’ia ai le alii 21 tausaga o Willow Lealofi Faisauvale o Faleatiu.
O le Aso Gafua na tula’i ai Willow i le Faamasinoga Maualuga ma tuuina atu ai e lana loia le tali tetee i moliaga e 4 a leoleo.
O lē ua molia na sa’ilia e leoleo ia Oketopa o le tausaga nei ina ua sa’ilia e le aiga o le teineitiiti na aafia se fesoasoani e toe maua ai.
O loo faaauau ona tatala i tua lē ua molia i aiaiga ua mae’a ona faataoto e le faamasinoga, e faatali ai le aso ua atofaina mo le faamasinoga.
