Ua faailoa e le afioga i le Minisita o Galuega Tetele a le Malo le tofa Olo Afoa Fiti Vaai, le taatia ai nei i luma o le laulau a fono a le Kapeneta, o se tulafono o loo faamoemoe e tuufaatasia uma ai faalapotopotoga tuma’oti a le Malo i le vaaiga a se Minisita e pei ona iai le Matagaluega o Faalapotopotoga Tuma’oti a le Malo le Ministry of Private Enterprises.
Ua faailoa ai e le Minisita lona teena o lea tulafono ona o lona manumanuga, i nisi o auaunaga tuma’oti a le Malo e pei o le malosi faaeletise, le pulega o le suavai, o le pulega o uafu ma isi auaunaga tuma’oti a le Malo o loo faagaioia i se tulaga e saili ai ni tupe maua mo galuega faatino a le Malo.
O le polokalame o le Soalaupule a le TV2 na faatalanoa ai le minisita ma ia faailoa lautele ai ona atugaluga ma popolega i le faatulai mai o lea tulafono, e faamoemoe e faatuma’oti ai ia auaunaga a le Malo ma tatala ai le avanoa e faatau ai sea o tagata lautele.
Na saunoa Olo afai ae faatino loa faapea i se tulaga faakamupani tuma’oti le faalapotopotoga o le eletise poo le pulega o le suavai, o le a avanoa ai loa tagata faipisinisi e maua seleni e faatau ai o latou sea, ma tatala ai foi le faitotoa i tagata i fafo e tele tupe poo investors e faatau o latou sea.
“O le ā la le mea o le a tupu, ua uu e tagata faipisinisi ma investors meatotino ma aseta tāua nei a le Malo, ma pule ai loa latou i le tau e faatau ai le eletise i tagata, pule latou i le tau o le suavai”.
Faaalia e le minisita ua uma ona faaleo lana tetee i le Tamaitai Palemia ma Minisita o le Kapeneta, ma lana tuualalo ia toe silasila toto’a i le tulafono, auā o le itu tāua ia te ia, o tagata lautele ia maua se fesoasoani i le taugata o le soifuaga, aemaise lava i le totogi o le suavai ma le eletise o ni vaega tāua o le soifuaga o aso uma.
Ua mae’a ona fausia le tulafono i le taimi o isi faigamalo a le HRPP ua mavae i le faamoemoe e tuufaatasia auaunaga tuma’oti uma a le Malo i se matagaluega, peitai na faaalia e le Minisita o galuega tetele, e oo mai i le taimi lenei e lei faatinoina lava, ona o le tele o vaega tāua e tatau ona matuā silasila toto’a iai.
“O le tulafono lena ua fai si leva, o se tulafono sa taumafai e tuufaatasia ai faalapotopotoga tuma’oti a le Malo.
“Manatua la e fitu faalapotopotoga faapena o loo i lalo o la’u vaaiga, ma o loo iai la le tulafono ua faataatia nei i le Kapeneta o le a agai uma ai faalapotopotoga nei i le matagaluega o le MPE (Ministry of Private Enterprises).”
O le autu o le tulafono o loo i luma nei o le Kapeneta o le faatuma’oti o ia faalapotopotoga i se faiga e faagaioia ai faapisinisi, i le naunautaiga e maua ai e le Malo ni tupe se tele e faatino ai ana galuega.
Peitai ua saunoa le minisita o galuega tetele i le polokalame o le Soalepule, e lē tatau ona faanatinati se tulaga faapea ae ia tapena lelei le lotoifale o le tulafono ina ia mautinoa, e lē aafia ai le soifuaga lelei o tagata lautele, i latou e maualalo lo latou tamaoaiga ma vaivai le tupe maua.
