E lei toe foi ane i totonu o le malae mo le ‘afa lona lua o le taaloga, le ausoka a Niu Sila, le All Whites, o se faailoga o lo latou tetee i uiga faailogalanu sa faia e se tasi o tama taalo o le ‘au a le Qatar, o Yousuf Abdurisag, a o faia sa latou taaloga i le Sonnenseestadion, i Ritizing i Oseteria i le aso ananafi.
E pei ona faailoa i se video i le itulau a le Stuff, o le itu na lē fiafia ai tama taaalo a le All Whites, ona o le leai o se gaioiga a le alii laufalī e fai ai se faaiuga talafeagai i le tama taalo a le Qatar lea na lafo ane ni ana lafoga o ni upu faailogalanu i le tama taalo a le All Whites, le alii o Michael Boxall.
E lē o mafai ona lagona lelei atu i le video upu na fai, ae foliga mai e matuiā nei lafoga faailogalanu, ona sa matuā iloa atu le lē fiafia o le kapeteni o le All Whites, le alii o Joe Bell a o finau ane i le laufalī, ma lulu lona ulu i le leai o se gaioiga e fai e le laufalī i uiga faailogalanu na faaalia.
O le tulai mai o lea faafitauli, na toatele i latou iloga i lenei taaloga o le soka, na faaali o latou lagona e lagolago i le gaioiga lototele na faia e le ‘au a le All Whites, ina ia momoli atu ai se feau malosi i le lalolagi atoa o nei taaloga faavaomalo, ‘e lē taliaina uiga faailogalanu i totonu o le taaloga’.
E mae’a le ‘afa muamua o lea taaloga o loo tau ‘ai le All Whites e 1 i le leai o se ‘ai a le Qatar, ma o le tulai mai o lenei faafitauli i le taaloga aemaise le leai o se gaioiga talafeagai a le laufalī ma ofisa o le taaloga, ua tilotilo ai le All Whites e tatau ona faaoo lava lenei mataupu i le pulega a le asosi autu le FIFA.
O Michael Joseph Boxall o se alii Niu Sila ae o ona tupuaga o Samoa, ma o le taimi nei o loo taalo mo le ‘au a le Minnesota United i le Major League Soccer, ma taalo foi i le ‘au tele a lona atunuu, le nationa football team a Niu Sila, le All Whites.
E taalo Boxall i le tulaga o le #5 / Defender mo le Minnesota United, ae i le tulaga #15 / Defender mo le All Whites a Niu Sila.
O le laufalī na faatautaia le taaloga na tulai mai ai lenei faafitauli i le aso ananafi, o se alii Oseteria o Manuel Schuttengruber, ae o le ‘au a le Qatar e mai se atunuu Arapi, lea sa talimalo i le taamilosaga o le Ipu a le Lalolagi o le soka, i le tausaga talu ai, 2022.
