O le tamaitai o Miracle Peī o loo molia i le maliu ai o se tina 27 tausaga mai Tufutafoe i se faalavelave tau taavale.

E lua moliaga o loo tuuaia ai o le avetaavale faatamala ua mafua ai le maliu o se isi tagata lea o loo teena e lea tamaitai ma le avetaavale e aunoa ma se laisene lea o loo ia ioeina.

O lea faalavelave na tulai mai ia Tesema o le tausaga na tea nei.

I faamaumauga o lea mataupu e faapea o lē ua maliu sa tietie i tua o le pikiapu sa faafoe e Miracle ma na pa’ū le tamaitai ua maliu ina ua lē mafai e Miracle ona taofiofi le taavale ina ua toe see agai i tua.

Na uma lava le soifua o lea tina i lea aso.

O le masina o Aperila o le a faia ai le faamasinoga o lea tamaitai.

E lua foi nisi mataupu faapea na tutulai ai nisi e ese mai ia Miracle i le faamasinoga ma o loo ioe i le leai o ni laisene avetaavale peitai o loo tetee atu i le moliaga autu o le avetaavale faatamala ua mafua ai le maliu o se tagata.